ନୂଆପଡ଼ା ପାଇଁ ଗର୍ବ: ବିଶିଷ୍ଟ ଗବେଷକ ଡଃ. ମହେନ୍ଦ୍ର ମିଶ୍ରଙ୍କୁ ମିଳିଲା ସଦୃଶ୍ୟ ‘ପଦ୍ମଶ୍ରୀ’ ସମ୍ମାନ

​ନୂଆପଡ଼ା: ଜିଲ୍ଲା ଖବର ଲାଇଫ ଓମ ପ୍ରକାଶ ଚୌଧୁରୀ ଓଡ଼ିଶା ତଥା ନୂଆପଡ଼ା ଜିଲ୍ଲା ପାଇଁ ଏକ ଗୌରବମୟ ମୁହୂର୍ତ୍ତ। ଭାଷା, ଆଦିବାସୀ ସଂସ୍କୃତି, ସାହିତ୍ୟ ଓ ଶିକ୍ଷା କ୍ଷେତ୍ରରେ ଅତୁଳନୀୟ ଅବଦାନ ପାଇଁ ମାଟିର ସୁଯୋଗ୍ୟ ସନ୍ତାନ ଡଃ. ମହେନ୍ଦ୍ର ମିଶ୍ରଙ୍କୁ ଦେଶର ସର୍ବୋଚ୍ଚ ନାଗରିକ ସମ୍ମାନ “ପଦ୍ମଶ୍ରୀ”ରେ ସମ୍ମାନିତ କରାଯାଇଛି। ନୂଆଦିଲ୍ଲୀସ୍ଥିତ ରାଷ୍ଟ୍ରପତି ଭବନଠାରେ ଆୟୋଜିତ ଏକ ସ୍ୱତନ୍ତ୍ର ଭବ୍ୟ ସମାରୋହରେ ମହାମହିମ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ ହସ୍ତରୁ ସେ ଏହି ସମ୍ମାନ ଗ୍ରହଣ କରିଛନ୍ତି। ​ଭାଷା ଓ ଆଦିବାସୀ ସଂସ୍କୃତିର ସୁରକ୍ଷା ପାଇଁ ସମର୍ପିତ ଜୀବନ ​ଡଃ. ମହେନ୍ଦ୍ର ମିଶ୍ର ନିଜ ସାରା ଜୀବନକୁ ଆଦିବାସୀ ସଂସ୍କୃତିର ପ୍ରଚାର, ପ୍ରସାର ଏବଂ ଲୋକଭାଷାର ସୁରକ୍ଷା ପାଇଁ ଉତ୍ସର୍ଗ କରିଛନ୍ତି। ଅନ୍ତର୍ଜାତୀୟ ସ୍ତରରେ ବିଭିନ୍ନ ଆଲୋଚନାଚକ୍ର ଓ କର୍ମଶାଳା ମାଧ୍ୟମରେ ସେ ଭାଷାର ଶୁଦ୍ଧତା ଏବଂ ମୌଳିକତା ରକ୍ଷା କରିବା ଉପରେ ସଦାସର୍ବଦା ଜୋର ଦେଇ ଆସିଛନ୍ତି। ତାଙ୍କ ମତରେ— “ଭାଷା ଓ ସଂସ୍କୃତି ହେଉଛି ଗୋଟିଏ ଜାତିର ପ୍ରକୃତ ପରିଚୟ, ଏହାର ସୁରକ୍ଷା ପ୍ରତିଟି ନାଗରିକର ଦାୟିତ୍ୱ।”​ଆଗାମୀ ପିଢ଼ି ପାଇଁ ପ୍ରେରଣାର ଉତ୍ସ​ଜିଲ୍ଲା, ରାଜ୍ୟ ପରିଧି ଡେଇଁ ଦେଶ-ବିଦେଶରେ ତାଙ୍କର ଉଚ୍ଚକୋଟୀର ଗବେଷଣାତ୍ମକ ଲେଖା ଓ ପୁସ୍ତକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛି। ନୂଆପଡ଼ା ଭଳି ଏକ ଆକାଂକ୍ଷୀ ଜିଲ୍ଲାରୁ ବାହାରି ସଫଳତାର ଶୀର୍ଷ ଛୁଇଁଥିବା ଡଃ. ମିଶ୍ରଙ୍କ ଏହି ଅଦ୍ଭୁତପୂର୍ବ ସଫଳତା ଆଗାମୀ ପିଢ଼ିର ଯୁବପିଢ଼ି ଓ ଛାତ୍ରଛାତ୍ରୀଙ୍କ ପାଇଁ ଏକ ବିରାଟ ପ୍ରେରଣାର ଉତ୍ସ ସାଜିବ।​ତାଙ୍କର ଏହି ଗୌରବମୟ କୃତିତ୍ୱ ପାଇଁ ନୂଆପଡ଼ା ଜିଲ୍ଲାବାସୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଏହି ଅବସରରେ ସମଗ୍ର ଜିଲ୍ଲାବାସୀଙ୍କ ତରଫରୁ ତାଙ୍କୁ ଆନ୍ତରିକ ଅଭିନନ୍ଦନ ଓ ଶୁଭେଚ୍ଛା ଜ୍ଞାପନ କରାଯାଉଛି।