ନୂଆପଡା (ଜିଲ୍ଲା ଖବର ଲାଇଭ ), ୨୯/୦୭: ନୂଆପଡ଼ା ଜିଲ୍ଲା ଖଡ଼ିଆଳ ବିଜ୍ଞାପିତ ଅଞ୍ଚଳ ପରିଷଦ (NAC) ଅନ୍ତର୍ଗତ ଲାଲ ସାହେବ ପଡ଼ା, ୱାର୍ଡ ନମ୍ବର ୦୭ ସ୍ଥିତ କଲ୍ୟାଣ ମଣ୍ଡପ-୨ ନିକଟରେ ସୃଷ୍ଟି ହୋଇଥିବା କୃତ୍ରିମ ଜଳବନ୍ଦୀ ସମସ୍ୟାର ଶେଷରେ ସମାଧାନ ହୋଇଛି। ପ୍ରଶାସନର ତୁରନ୍ତ ଓ ଦୃଢ଼ ପଦକ୍ଷେପ ଯୋଗୁଁ ବେଆଇନ ଭାବେ ଅବରୋଧ କରାଯାଇଥିବା ପ୍ରାଚୀନ ଜଳ ନିଷ୍କାସନ ପଥକୁ ମୁକ୍ତ କରାଯାଇଛି, ଯାହା ଫଳରେ ସ୍ଥାନୀୟ ଅଞ୍ଚଳବାସୀ ଦୀର୍ଘ ଦିନର ଜଳଯନ୍ତ୍ରଣାରୁ ଆଶ୍ୱସ୍ତି ପାଇଛନ୍ତି।
ବେଆଇନ ଜବରଦଖଲ ଯୋଗୁଁ ସୃଷ୍ଟି ହୋଇଥିଲା ସମସ୍ୟା: ସୂଚନାଯୋଗ୍ୟ ଯେ, କିଛି ବ୍ୟକ୍ତିବିଶେଷ ସ୍ୱାର୍ଥପର ଭାବେ ବର୍ଷ ବର୍ଷ ଧରି ରହିଥିବା ପ୍ରାଚୀନ ଜଳ ନିଷ୍କାସନ ପୋଲ ଓ ନାଳକୁ ବେଆଇନ ଭାବେ ବନ୍ଦ କରିଦେଇଥିଲେ। ଫଳରେ ସାମାନ୍ୟ ବର୍ଷାରେ ମଧ୍ୟ ବର୍ଷା ଜଳ ନିଷ୍କାସିତ ହୋଇନପାରି ରାସ୍ତାଘାଟ ଓ ଲୋକଙ୍କ ଘର ଦ୍ୱାର ମୁହଁରେ ଅଟକି ରହୁଥିଲା। ଏହାଯୋଗୁଁ ଖଡ଼ିଆଳ ଏନ୍ଏସିର ଅଧାରୁ ଅଧିକ ଅଞ୍ଚଳ, ବିଶେଷ କରି ମାଛ ବଜାର, ଲାଲ ସାହେବ ପଡ଼ା, ରାମସ୍ୱାମୀ ମାର୍ଗ ଏବଂ କଲ୍ୟାଣ ମଣ୍ଡପ-୨ ନିକଟସ୍ଥ ଅଞ୍ଚଳ ଜଳମଗ୍ନ ହୋଇ ସାଧାରଣ ଜୀବନଯାତ୍ରା ବ୍ୟାହତ ହୋଇପଡ଼ିଥିଲା।
ଏନ୍ଏସିର ତୁରନ୍ତ ପଦକ୍ଷେପ: ଏହି ସମସ୍ୟା ଗୁରୁତର ରୂପ ନେବା ପରେ, ଖଡ଼ିଆଳ ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ଘଟଣାସ୍ଥଳରେ ପହଞ୍ଚି ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଇଥିଲା। ବେଆଇନ ଭାବେ ବନ୍ଦ କରାଯାଇଥିବା ପ୍ରାଚୀନ ଜଳ ନିଷ୍କାସନ ପୋଲକୁ ପୁନର୍ବାର ଖୋଲାଯାଇ ଜଳ ନିଷ୍କାସନର ବ୍ୟବସ୍ଥା କରାଯାଇଥିଲା। ଫଳରେ ଜମି ରହିଥିବା ବର୍ଷା ଜଳ ଶୀଘ୍ର ନିଷ୍କାସିତ ହୋଇଯାଇଛି ଏବଂ ସଡ଼କ ଉପରେ ଯାତାୟାତ ସ୍ୱାଭାବିକ ହୋଇଛି।
ଅଞ୍ଚଳବାସୀଙ୍କ ନିବେଦନ ଓ ଦାବି: କିଛି ବ୍ୟକ୍ତିଙ୍କ ଅସାଧୁ ଉଦ୍ଦେଶ୍ୟ ଯୋଗୁଁ ପୂରା ଅଞ୍ଚଳବାସୀଙ୍କୁ କୃତ୍ରିମ ଜଳବନ୍ଦୀର ଶିକାର ହେବାକୁ ପଡ଼ୁଥିବାରୁ ଅସନ୍ତୋଷ ପ୍ରକାଶ ପାଇଛି। ଏହି ପ୍ରାଚୀନ ଜଳ ନିଷ୍କାସନ ପଥ ଓ ନାଳ-ନର୍ଦ୍ଦମାକୁ ସବୁଦିନ ପାଇଁ ଖୋଲା ରଖିବା ସହ ସ୍ଥାୟୀ ସମାଧାନ କରିବାକୁ ସ୍ଥାନୀୟ ବାସିନ୍ଦା ପ୍ରଶାସନ ନିକଟରେ ଦୃଢ଼ ଦାବି କରିଛନ୍ତି।
