ଲଗାଣ ବର୍ଷାରେ ବେହାଲ ନୂଆପଡ଼ା: ଖଡ଼ିଆଳ ପୂଟୁପଡ଼ା ନିକଟରେ ଧୋଇଗଲା ସିନାପାଲି-ଖଡ଼ିଆଳ ମୁଖ୍ୟ ସଡ଼କ, ଯାତାୟାତ ସମ୍ପୂର୍ଣ୍ଣ ଠପ୍
ଲଗାଣ ବର୍ଷାରେ ବେହାଲ ନୂଆପଡ଼ା: ଖଡ଼ିଆଳ ପୂଟୁପଡ଼ା ନିକଟରେ ଧୋଇଗଲା ସିନାପାଲି-ଖଡ଼ିଆଳ ମୁଖ୍ୟ ସଡ଼କ, ଯାତାୟାତ ସମ୍ପୂର୍ଣ୍ଣ ଠପ୍
ଖଡ଼ିଆଳ (ଜିଲ୍ଲା ଖବର ଲାଇଫ ): ନୂଆପଡ଼ା ଜିଲ୍ଲାରେ ଲଗାଣ ଲଘୁଚାପ ଜନିତ ବୃଷ୍ଟିପାତ ପ୍ରବଳ ତାଣ୍ଡବ ଲୀଳା ରଚନା କରିଛି। ବ୍ରହ୍ମାସ୍ତ୍ର ସଦୃଶ ବର୍ଷିଥିବା ଜଳରାଶି ଯୋଗୁଁ ଜିଲ୍ଲାର ବିଭିନ୍ନ ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ବେଳେ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡ଼ିଛି।
ବିଶେଷ କରି ଖଡ଼ିଆଳ ସହରର ୧୨ ନମ୍ବର ୱାର୍ଡ ଅନ୍ତର୍ଗତ ପୂଟୁପଡ଼ା ଠାରେ ବର୍ଷା ଜଳର ପ୍ରବଳ ସ୍ରୋତରେ ସିନାପାଲି-ଖଡ଼ିଆଳ ମୁଖ୍ୟ ସଡ଼କ ସମ୍ପୂର୍ଣ୍ଣ ଭାବେ ଧୋଇଯାଇଛି। ରାସ୍ତା ମଝିରେ ବଡ଼ ବଡ଼ ଖାଲ ସୃଷ୍ଟି ହୋଇ ପାଣି ପ୍ରବାହିତ ହେଉଥିବାରୁ ଏହି ଗୁରୁତ୍ୱପୂର୍ଣ୍ଣ ମୁଖ୍ୟ ରାସ୍ତାରେ ଯାନବାହାନ ଯାତାୟାତ ପୂରାପୂରି ବନ୍ଦ ହୋଇଯାଇଛି। ଫଳରେ ସିନାପାଲି ଓ ଖଡ଼ିଆଳ ମଧ୍ୟରେ ସମ୍ପର୍କ ବିଚ୍ଛିନ୍ନ ହୋଇପଡ଼ିବା ସହ ଶହ ଶହ ଯାତ୍ରୀ ଓ ସ୍ଥାନୀୟ ଲୋକେ ଗୁରୁତର ସମସ୍ୟାର ସମ୍ମୁଖୀନ ହୋଇଛନ୍ତି।
ଜିଲ୍ଲାରେ ବନ୍ୟା ପରିସ୍ଥିତି: ଗତ କିଛି ଦିନ ହେବ କ୍ରମାଗତ ଭାବେ ହେଉଥିବା ଅବିଶ୍ରାନ୍ତ ବର୍ଷା ଯୋଗୁଁ ନାଳ-ନର୍ଦ୍ଦମା ଓ ନଦୀଗୁଡ଼ିକରେ ଜଳସ୍ତର ବୃଦ୍ଧି ପାଇଛି। ଜିଲ୍ଲାର ଅନେକ ନିଚ୍ଛାଟିଆ ଅଞ୍ଚଳରେ ବର୍ଷା ପାଣି ପଶିଯାଇ ଗ୍ରାମଗୁଡ଼ିକ ଜଳବନ୍ଦୀ ହୋଇରହିଛନ୍ତି। ଚାଷଜମିଗୁଡ଼ିକ ପାଣିରେ ବୁଡ଼ି ରହିଥିବାରୁ ବ୍ୟାପକ କ୍ଷତିର ଆଶଙ୍କା କରାଯାଉଛି।
ସ୍ଥାନୀୟ ବାସିନ୍ଦାଙ୍କ କହିବା ଅନୁଯାୟୀ, ରାସ୍ତା ଧୋଇଯିବା ଫଳରେ ଜରୁରୀକାଳୀନ ସେବା ଜେମିତିକି ଆମ୍ବୁଲାନ୍ସ ଓ ଅଗ୍ନିଶମ ଗାଡ଼ି ଯିବାଆସିବା କରିବା ମଧ୍ୟ ଅସମ୍ଭବ ହୋଇପଡ଼ିଛି। ପୂର୍ତ୍ତ ବିଭାଗ ଓ ଜିଲ୍ଲା ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ରାସ୍ତାର ଅସ୍ଥାୟୀ ମରାମତି କରି ଯାତାୟାତ ସ୍ୱାଭାବିକ କରିବାକୁ ଏବଂ ବିପନ୍ନଙ୍କୁ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି।
