ନୂଆପଡ଼ାରେ ଚାଷୀ ଆନ୍ଦୋଳନ ସଫଳ:

​ନୂଆପଡ଼ା, ୧୬ ୬ (ଜିଲ୍ଲା ଖବର):­ନୂଆପଡ଼ା ଜିଲ୍ଲାରେ ରବି ଧାନ ସଂଗ୍ରହ ଓ ମଣ୍ଡି ସମସ୍ୟାକୁ ନେଇ ଦୀର୍ଘ ସମୟ ଧରି ଲାଗି ରହିଥିବା ଅଚଳାବସ୍ଥାର ଶେଷରେ ସମାଧାନ ହୋଇଛି। ଧାନ ମଣ୍ଡିରୁ ସୁଚାରୁ ରୂପେ ଧାନ ନଉଠିବା ପ୍ରତିବାଦରେ ଚାଷୀମାନେ ରାଜରାସ୍ତାକୁ ଓହ୍ଲାଇ ବ୍ୟାପକ ଆନ୍ଦୋଳନ କରିଥିଲେ। ତେବେ ଜିଲ୍ଲାପାଳଙ୍କ କାର୍ଯ୍ୟାଳୟଠାରେ ରାଜ୍ୟ ପଞ୍ଚାୟତରାଜ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ଏବଂ ଜିଲ୍ଲା ପ୍ରଶାସନ ସହ କୃଷକ ପ୍ରତିନିଧି ଦଳର ସଫଳ ଆଲୋଚନା ପରେ ଆନ୍ଦୋଳନକୁ ପ୍ରତ୍ୟାହାର କରାଯାଇଛି।​ମନ୍ତ୍ରୀ ଓ ପ୍ରଶାସନିକ ଅଧିକାରୀଙ୍କ ସହ ଉଚ୍ଚସ୍ତରୀୟ ଆଲୋଚନା​ଧାନ ଉଠାନ ସମସ୍ୟାର ସ୍ଥାୟୀ ସମାଧାନ ପାଇଁ ବେଲଟୁକରି ଗ୍ରାମର ଏକ ୧୦ ଜଣିଆ ଚାଷୀ ପ୍ରତିନିଧି ଦଳ ଜିଲ୍ଲାପାଳଙ୍କ କାର୍ଯ୍ୟାଳୟରେ ଓଡ଼ିଶାର ପଞ୍ଚାୟତରାଜ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ରବି ନାରାୟଣ ନାଏକଙ୍କୁ ସାକ୍ଷାତ କରିଥିଲେ। ଏହି ଗୁରୁତ୍ୱପୂର୍ଣ୍ଣ ବୈଠକରେ ବିଭିନ୍ନ ଦିଗ ଉପରେ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା। ବୈଠକରେ ମନ୍ତ୍ରୀଙ୍କ ସହ ନୂଆପଡ଼ା ଜିଲ୍ଲାପାଳ ମଧୁସୂଦନ ଦାଶ, ଉପ-ଜିଲ୍ଲାପାଳ ସୁର୍ମୀ ସୋରେନ, ଜିଲ୍ଲା ଯୋଗାଣ ଅଧିକାରୀ ତ୍ରିଲୋଚନ ମାଝୀ ଏବଂ ସ୍ଥାନୀୟ ତହସିଲଦାର ପ୍ରମୁଖ ଉପସ୍ଥିତ ରହି ଚାଷୀଙ୍କ ସମସ୍ୟାର ସମାଧାନ ପାଇଁ ରୋଡମ୍ୟାପ୍ ପ୍ରସ୍ତୁତ କରିଥିଲେ।​ଅଧିକାରୀଙ୍କୁ ମିଳିଲା ସ୍ୱତନ୍ତ୍ର ଦାୟିତ୍ୱ​ମଣ୍ଡି ପରିଚାଳନାକୁ ଶୃଙ୍ଖଳିତ କରିବା ପାଇଁ ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ନିଆଯାଇଛି:​ବେଲଟୁକରି ମଣ୍ଡି: ଏଠାରେ ସମସ୍ତ ବ୍ୟବସ୍ଥା ତଦାରଖ କରିବା ପାଇଁ ନୂଆପଡ଼ା ଅତିରିକ୍ତ ତହସିଲଦାର ଦିଲୀପ ପାତ୍ରଙ୍କୁ ସ୍ୱତନ୍ତ୍ର ଦାୟିତ୍ୱ ଦିଆଯାଇଛି। ସେ ମଣ୍ଡିକୁ ଧାନ ଆସିବା ସହ ଧାନ ଉଠାନ ନେଇ ସମସ୍ତ ତଥ୍ୟ ସଂଗ୍ରହ କରି ଜିଲ୍ଲାପାଳ ଓ ଉପ-ଜିଲ୍ଲାପାଳଙ୍କୁ ରିପୋର୍ଟ ହସ୍ତାନ୍ତର କରିଛନ୍ତି। ​ନୂଆପଡ଼ା ବ୍ଲକ୍: ଏହି ବ୍ଲକର ମଣ୍ଡି ଦାୟିତ୍ୱରେ ସ୍ୱୟଂ ଉପ-ଜିଲ୍ଲାପାଳ ସୁର୍ମୀ ସୋରେନ ରହିବେ। ​ଖଡ଼ିଆଳ, ବୋଡ଼େନ ଓ ସିନାପାଲି ବ୍ଲକ୍: ଏହି ତିନୋଟି ବ୍ଲକ୍ ପାଇଁ ଅତିରିକ୍ତ ଜିଲ୍ଲାପାଳ ସୁବାଷ ଚନ୍ଦ୍ର ରଇତଙ୍କୁ ଦାୟିତ୍ୱ ପ୍ରଦାନ କରାଯାଇଛି। ​ଗୋଟିଏ ବି ଟୋକନ ଲେପ୍ସ ହେବ ନାହିଁ: ଜିଲ୍ଲାପାଳ ​ଚାଷୀଙ୍କ ମଧ୍ୟରେ ଥିବା ସବୁଠାରୁ ବଡ଼ ଆଶଙ୍କା ଦୂର କରି ଜିଲ୍ଲାପାଳ ମଧୁସୂଦନ ଦାଶ ପ୍ରତିଶ୍ରୁତି ଦେଇଛନ୍ତି ଯେ, ଜିଲ୍ଲାର ସମସ୍ତ ରବି ଧାନ ସୁଚାରୁ ରୂପେ ଉଠାଯିବ ଏବଂ କୌଣସି ବି ଚାଷୀଙ୍କର ଗୋଟିଏ ହେଲେ ଟୋକନ ଲେପ୍ସ (ବାତିଲ) ହେବାକୁ ଦିଆଯିବ ନାହିଁ। ଏହି ଆଲୋଚନା ସମୟରେ ଅଜିତ୍ କିଶୋର ଚାଲାନ ଖଡ଼ିଆଳ ମଣ୍ଡିର ବିଭିନ୍ନ ସମସ୍ୟା ଓ ଏହାର ସମାଧାନ ଉପରେ ବିଶେଷ ଗୁରୁତ୍ଵ ଦେଇଥିଲେ। ​ପ୍ରଶାସନ ଏବଂ ମନ୍ତ୍ରୀଙ୍କ ଠାରୁ ଦୃଢ଼ ପ୍ରତିଶ୍ରୁତି ମିଳିବା ପରେ ଚାଷୀ ପ୍ରତିନିଧି ଦଳ ସନ୍ତୋଷ ପ୍ରକାଶ କରିଛନ୍ତି ଏବଂ ରାଜରାସ୍ତାରୁ ଆନ୍ଦୋଳନ ପ୍ରତ୍ୟାହାର କରିନେଇଛନ୍ତି। ଏହାଦ୍ୱାରା ଜିଲ୍ଲାରେ ସ୍ବାଭାବିକ ସ୍ଥିତି ଫେରିଆସିଛି।

ନୂଆପଡା ଜିଲ୍ଲା ରୁ ଓମ ପ୍ରକାଶ ଚୌଧୁରୀ ଜିଲ୍ଲା ଖବର ଲାଇଫ