ପ୍ରାୟ ଦୁଇ ବର୍ଷର ନୀରବତା ପରେ କୋରେଇର ପୂର୍ବତନ ବିଧାୟକ ଅଶୋକ ବଳ ଯାଜପୁର ଜିଲ୍ଲା ବିଜୁ ଜନତା ଦଳ କାର୍ଯ୍ୟକାରିଣୀ ବୈଠକରେ ଯୋଗଦେଇଛନ୍ତି । ଏହି ଘଟଣା ଜିଲ୍ଲା ରାଜନୀତିରେ ଚର୍ଚ୍ଚାର ବିଷୟ ହୋଇଛି । ୨୦୨୪ ନିର୍ବାଚନରେ କୋରେଇରୁ ଅଶୋକଙ୍କୁ ପ୍ରାର୍ଥୀ କରାଯାଇ ନଥିଲା । ତାଙ୍କ ସ୍ଥାନରେ ବବିଙ୍କ ମା’ ସଂଧ୍ୟାରଣୀ ଦାସଙ୍କୁ ପ୍ରାର୍ଥୀ କରାଯାଇଥିଲା । ସଂଧ୍ୟାରଣୀ ସେଠାରୁ ପରାଜିତ ହୋଇଥିଲେ । ଟିକେଟ ପରିବର୍ତ୍ତନ ସମୟରୁ ଅଶୋକ ନିରବ ହୋଇ ଯାଇଥିଲେ । ଦଳରେ ଥିଲେ ମଧ୍ୟ ଦଳର କୌଣସି ସଭା ସମିତିରେ ତାଙ୍କୁ ଦେଖିବାକୁ ମିଳୁନଥିଲା । ଅନ୍ୟ ପକ୍ଷରେ ସମ୍ବଲପୁରରୁ ପରାଜିତ ହେଲା ପରେ କୋରେଇରେ ସଂଗଠନ ସଜାଡ଼ିବା ଆରମ୍ଭ କରିଥିଲେ ବବି । ନିଜ ନିର୍ବାଚନ ମଣ୍ଡଳୀ ଯାଜପୁର ଅପେକ୍ଷା କୋରେଇ ଉପରେ ଅଧିକ ଗୁରୁତ୍ୱ ଦେଉଥିଲେ ବବି । କେବଳ ସେ ନୁହଁନ୍ତି ତାଙ୍କ ସାନଭାଇ ଭଵ ପ୍ରସାଦ ଦାସ ମଧ୍ୟ କୋରେଇରେ ଘରଘର ବୁଲିବା ଦେଖୁବାକୁ ମିଳୁଥିଲା । ବିଭିନ୍ନ ରାଜନୈତିକ କାର୍ଯ୍ୟକ୍ରମ ସହିତ ସାମାଜିକ କାର୍ଯ୍ୟକ୍ରମରେ ଉଭୟ ଯୋଗଦାନ କରିଥିଲେ । ବବିଙ୍କ ଦ୍ୱାରା ଆୟୋଜିତ ଦଳୀୟ କାର୍ଯ୍ୟକ୍ରମକୁ ଅଶୋକଙ୍କୁ ଡକା ଯାଉ ନଥିଲା । ଅଶୋକଙ୍କୁ ଏକ ପ୍ରକାର ଏକ ଘରିକିଆ କରି ରଖିଥିଲେ ବବି । ବବିଙ୍କୁ କିମ୍ବା ତାଙ୍କ ପରିବାରକୁ କୋରେଇବାସୀ ଗ୍ରହଣ କରୁ ନଥିବା ଭୋଟ ମାଧ୍ୟମରେ କୋରେଇବାସୀ ଜଣାଇ ଦେଇଥିଲେ ମଧ୍ୟ ବବି କିନ୍ତୁ ୨୦୨୯ ନିର୍ବାଚନକୁ ଆଖି ଆଗରେ ରଖି ସଂଗଠନ ସଜାଡୁଥିଲେ । ଏବେ ବିଜେଡି ରାଜନୀତିରେ ପାଣ୍ଡିଆନ-ବବି ବିବାଦ ଚରମ ସୀମାରେ ପହଞ୍ଚିଥିଲା ବେଳେ ଦୁଇଦିନ ତଳେ ନବୀନ ନିବାସରୁ ଅଶୋକଙ୍କୁ ଡାକରା ଆସିଥିଲା । ଅଶୋକ ନବୀନ ନିବାସ ଯାଇ ଦଳ ସଭାପତିଙ୍କୁ ଭେଟିଲା ପରେ ଜିଲ୍ଲା କାର୍ଯ୍ୟକାରୀଣି ବୈଠକରେ ଯୋଗଦେଇଥିଲେ । ଯାହା ଚର୍ଚ୍ଚାର ବିଷୟ ହୋଇଛି । ଅଶୋକ ଦୀର୍ଘ ଦୁଇ ବର୍ଷ କୋରେଇ ରାଜନୀତିରୁ ଦୂରେଇ ରହିବା ପୁଣି ଜିଲ୍ଲା ବୈଠକରେ ଯୋଗଦେବା ଫଳରେ ଦଳୀୟ ଶୀର୍ଷ ନେତୃତ୍ୱ ଆଗାମି ଦିନରେ କୋରେଇ ପାଇଁ ଭିନ୍ନ ଚିନ୍ତା କରୁଥିବା ଚର୍ଚ୍ଚା ହେଉଛି । ଦଳ ମଧ୍ୟରେ ଦିନକୁ ଦିନ ବବିଙ୍କ ପତିଆରା କମି କମି ଯାଉଥିଲା ବେଳେ କୋରେଇକୁ ଜାବୁଡି ଧରିଥିବା ବବିଙ୍କ ହାତରୁ କୋରେଇ ଖସିଯିବାର ଆଶଙ୍କା ଦେଖା ଦେଇଛି । କୋରେଇ ରାଜନୀତିରେ ଅଶୋକଙ୍କ ଏଣ୍ଟ୍ରି ବବିଙ୍କ ପାଇଁ ସତର୍କ ଘଣ୍ଟି ନୁହେଁ ତ ?
