ମହାମହିମ ରାଜ୍ୟପାଳଙ୍କ ଦ୍ବାରା ନୂଆପଡ଼ା ଜିଲ୍ଲାର ସ୍କାଉଟସ୍ ଓ ଗାଇଡସ୍ ପୁରସ୍କୃତ: ଜିଲ୍ଲା ପାଇଁ ଗୌରବ

​ନୂଆପଡା ୨୩ ୫(ଜିଲ୍ଲା ଖବର ଲାଇଫ ): ନୂଆପଡ଼ା ଜିଲ୍ଲା ପାଇଁ ଏକ ଗୌରବମୟ ମୁହୂର୍ତ୍ତ। ଓଡ଼ିଶା ରାଜ୍ୟ ଭାରତ ସ୍କାଉଟସ୍ ଓ ଗାଇଡ୍ସ ସଂସ୍ଥା ଆନୁକୂଲ୍ୟରେ ଭୁବନେଶ୍ୱରସ୍ଥିତ ଲୋକ ସେବା ଭବନଠାରେ ୨୦୨୫ ବର୍ଷ ପାଇଁ ରାଜ୍ୟ ସ୍ତରୀୟ ପୁରସ୍କାର ବିତରଣ ଉତ୍ସବ ଅତ୍ୟନ୍ତ ଧୂମଧାମରେ ଆୟୋଜିତ ହୋଇଯାଇଛି। ଏହି ସ୍ପେଶାଲ୍ ଉତ୍ସବରେ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ପାରଦର୍ଶିତା ପ୍ରଦର୍ଶନ କରିଥିବା କୃତୀ ସ୍କାଉଟସ୍ ଓ ଗାଇଡସ୍‌ମାନଙ୍କୁ ମହାମହିମ ରାଜ୍ୟପାଳ ପୁରସ୍କୃତ କରିଛନ୍ତି।​ଭବ୍ୟ ସମାରୋହ ଓ ଅତିଥି ବୃନ୍ଦ​ରାଜ୍ୟ ମୁଖ୍ୟ କମିଶନର ମାନ୍ୟବର ଶ୍ରୀଯୁକ୍ତ ଡ. କାଳିପ୍ରସାଦ ମିଶ୍ରଙ୍କ ସଭାପତିତ୍ୱ ଏବଂ ରାଜ୍ୟ ସମ୍ପାଦିକା ଶ୍ରୀମତୀ ଅନାମିକା ଦାସଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଏହି କାର୍ଯ୍ୟକ୍ରମ ପରିଚାଳିତ ହୋଇଥିଲା। ଓଡ଼ିଶାର ମହାମହିମ ରାଜ୍ୟପାଳ ଡ. ହରିବାବୁ କମ୍ଭମ୍ପାଟି ମୁଖ୍ୟ ଅତିଥି ଭାବେ ଯୋଗଦେଇ କୃତୀ ଛାତ୍ରଛାତ୍ରୀ ଓ ଗାଇଡ୍‌ମାନଙ୍କୁ ସମ୍ମାନିତ କରିବା ସହ ସେମାନଙ୍କ ଉଜ୍ଜଳ ଭବିଷ୍ୟତ କାମନା କରିଥିଲେ।​ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ମାନ୍ୟବର ଶ୍ରୀଯୁକ୍ତ ନିତ୍ୟାନନ୍ଦ ଗଣ୍ଡ ଏହି ଅବସରରେ ଉପସ୍ଥିତ ରହି ସମସ୍ତ ପୁରସ୍କାର ବିଜେତାଙ୍କୁ ସେବା ଓ ଶୃଙ୍ଖଳାର ମାର୍ଗରେ ଆଗକୁ ବଢ଼ିବା ପାଇଁ ଉତ୍ସାହିତ କରିଥିଲେ। ​ମଞ୍ଚରେ ନୂଆପଡ଼ାର ଦେଖିବାକୁ ମିଳିଲା ଚମକ ​ଏହି ରାଜ୍ୟ ସ୍ତରୀୟ ପୁରସ୍କାର ଉତ୍ସବରେ ନୂଆପଡ଼ା ଜିଲ୍ଲା ସ୍କାଉଟ ଓ ଗାଇଡ଼ ସଂସ୍ଥାର ଜିଲ୍ଲା ମୁଖ୍ୟ କମିଶନର ଡ. ପ୍ରଶାନ୍ତ କୁମାର ମହାନ୍ତିଙ୍କ ନିର୍ଦ୍ଦେଶ କ୍ରମେ ଏକ ସ୍ୱତନ୍ତ୍ର ଟିମ୍ ଯୋଗ ଦେଇଥିଲେ। ଜିଲ୍ଲା ସମ୍ପାଦକ ରତନ ସିଂ ବାରିକ ଏବଂ ଜିଲ୍ଲା ପ୍ରଶିକ୍ଷଣ ଆୟୋଗ ଅଶୋକ କୁମାର ବେହେରାଙ୍କ ସଠିକ୍ ମାର୍ଗଦର୍ଶନରେ ଜିଲ୍ଲାର ପ୍ରତିଭାମାନେ ସେଠାରେ ପହଞ୍ଚିଥିଲେ। ​ସିନାପାଲି ସରକାରୀ ବିଦ୍ୟାଳୟର ସ୍କାଉଟ ମାଷ୍ଟର ଭାସ୍କର କୁମାର ପାତ୍ର, ​ସରସ୍ବତୀ ଶିଶୁ ବିଦ୍ୟା ମନ୍ଦିରର ଗାଇଡ୍ କ୍ୟାପଟେନ୍ ଶ୍ରୀମତୀ ରୀନା ମେହେରଙ୍କ ତତ୍ତ୍ବାବଧାନରେ ୪ ଜଣ ସ୍କାଉଟ୍ ଓ ୪ ଜଣ ଗାଇଡ୍ ସିଧାସଳଖ ମହାମହିମ ରାଜ୍ୟପାଳଙ୍କ ହାତରୁ ସମ୍ମାନଜନକ ପ୍ରମାଣ ପତ୍ର ଗ୍ରହଣ କରିଥିଲେ।​ଖଡ଼ିଆଳ ରାଜା ଆର୍ତ୍ତତ୍ରାଣ ହାଇସ୍କୁଲ ସମେତ ଜିଲ୍ଲାର ଅନ୍ୟାନ୍ୟ ପ୍ରମୁଖ ବିଦ୍ୟାଳୟର ଛାତ୍ରଛାତ୍ରୀମାନଙ୍କର ଏହି ସଫଳତା ସମଗ୍ର ଅଞ୍ଚଳରେ ଆନନ୍ଦର ଲହରୀ ଖେଳାଇ ଦେଇଛି। ​ରେକର୍ଡ ସଂଖ୍ୟକ ସ୍କାଉଟ ଓ ଗାଇଡ୍ ଉତ୍ତୀର୍ଣ୍ଣ ​ସୂଚନାଯୋଗ୍ୟ ଯେ, ପୂର୍ବରୁ ଅନୁଷ୍ଠିତ ହୋଇଥିବା କଠିନ ରାଜ୍ୟ ପୁରସ୍କାର ପରୀକ୍ଷାରେ ନୂଆପଡ଼ା ଜିଲ୍ଲାରୁ ବିପୁଳ ସଫଳତା ମିଳିଥିଲା। ଏହି ପରୀକ୍ଷାରେ ଜିଲ୍ଲାର ମୋଟ ୪୮ ଜଣ ସ୍କାଉଟସ୍ ଏବଂ ୬୮ ଜଣ ଗାଇଡ୍ସ କୃତକାର୍ଯ୍ୟ ହୋଇ ଜିଲ୍ଲା ପାଇଁ ଗୌରବ ଆଣିଛନ୍ତି। ନୂଆପଡ଼ା ଭଳି ଏକ ଆକାଂକ୍ଷୀ ଜିଲ୍ଲାରୁ ଏତେ ବଡ଼ ସଂଖ୍ୟାରେ ସ୍କାଉଟ ଓ ଗାଇଡ୍ସ ସଫଳ ହେବା ନିଶ୍ଚିତ ଭାବେ ଶିକ୍ଷା ଓ ଶୃଙ୍ଖଳା କ୍ଷେତ୍ରରେ ଏକ ବଡ଼ ସଫଳତା ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।​ଛାତ୍ରଛାତ୍ରୀଙ୍କ ଏହି ଭବ୍ୟ ସଫଳତା ପାଇଁ ବିଭିନ୍ନ ବିଦ୍ୟାଳୟର ପ୍ରଧାନଶିକ୍ଷକ, ଶିକ୍ଷାବିତ୍ ଓ ସ୍ଥାନୀୟ ଜନସାଧାରଣ ସମସ୍ତ କୃତୀ ସ୍କାଉଟ-ଗାଇଡ୍ ଏବଂ ଗୁରୁଜୀ-ଗୁରୁମାମାନଙ୍କୁ ଶୁଭେଚ୍ଛା ଜଣାଇଛନ୍ତି।